திருமண ஆண்டு நிறைவு நாளில் ஆசியுரை

(தம்பதிகளும் பிள்ளைகளும் எரியும் திரிகளுடன் குருமுன் நிற்பர்.)

குரு: தந்தை, மகன், தூய ஆவியின் பெயராலே

எல்: ஆமென்.

குரு: நம் ஆண்டவராகிய இயேசு கிறிஸ்துவின் அன்பும் அருளும் உங்களோடு இருப்பதாக.

எல்: உம்மோடும் இருப்பதாக.

குரு: அன்புள்ளம் கொண்ட தம்பதியரே, உங்கள் திருமண ஆண்டு நிறைவு நாளில், உங்களது திருமண வாழ்விற்கு நன்றி கூற இறைவன் முன் நிற்கின்றீர்கள். நம் வானகத் தந்தை உங்கள்மேல் அன்புகூர்ந்து உங்களை நிறைவாய் ஆசீர்வதிக்கத் திருவுளம் கொண்டுள்ளார். வாழ்விற்கு வளமளிக்கும் இறை வார்த்தையைப் பக்தி உருக்கமுடன் செவிகொடுத்துக் கேட்பீர்களாக.

அருள்வாக்கு: கொலோ. 3:18-21 

திருமணமான பெண்களே, உங்கள் கணவருக்கு நீங்கள் பணிந்திருங்கள். ஆண்டவரைச் சார்ந்து வாழ்வோருக்கு இதுவே தகும். திருமணமான ஆண்களே, உங்கள் மனைவியரிடம் அன்பு செலுத்துங்கள். அவர்களைக் கொடுமைப்படுத்தாதீர்கள். பிள்ளைகளே, உங்கள் பெற்றோருக்கு முற்றிலும் கீழ்ப்படியுங்கள். ஆண்டவரைச் சார்ந்தவர்களுக்கு இதுவே தகும். பெற்றோர்களே, உங்கள் பிள்ளைகளுக்கு எரிச்சல் மூட்டாதீர்கள். அப்படிச் செய்தால் அவர்கள் மனந்தளர்ந்து போவார்கள்.

இது ஆண்டவர் வழங்கும் அருள்வாக்கு

(திருமண ஒப்பந்தத்தை நினைவுபடுத்திக் குரு சிறு மறையுரை ஆற்றுகின்றார். தொடர்ந்து மௌன நேரத்தில் தம்பதியர் தங்கள் திருமண ஒப்பந்தத்தை மனத்திலேயே புதுப்பித்துக்கொள்கின்றனர்.)

பதிலுரைப்பாடல்: திபா. 128:1-2; 3-4; 5-6

பல்லவி: ஆண்டவர் சீயோனிலிருந்து உமக்கு ஆசி வழங்குவாராக!

1. ஆண்டவருக்கு அஞ்சி அவர் வழிகளில் நடப்போர் பேறு பெற்றோர்! உமது உழைப்பின் பயனை நீர் உண்பீர்! நீர் நற்பேறும் நலமும் பெறுவீர்! பல்லவி

2. உம் இல்லத்தில் உம் துணைவியார் கனிதரும் திராட்சைக் கொடிபோல் இருப்பார்; உண்ணும் இடத்தில் உம் பிள்ளைகள் ஒலிவக் கன்றுகளைப் போல் உம்மைச் சூழ்ந்திருப்பர். ஆண்டவருக்கு அஞ்சி நடக்கும் ஆடவர் இத்தகைய ஆசி பெற்றவராய் இருப்பார். பல்லவி

3. ஆண்டவர் சீயோனிலிருந்து உமக்கு ஆசி வழங்குவராக! உம் வாழ்நாளெல்லாம் நீர் எருசலேமின் நல்வாழ்வைக் காணும்படி செய்வாராக! நீர் உம் பிள்ளைகளின் பிள்ளைகளைக் காண்பீராக! இஸ்ரயேலுக்கு நலம் உண்டாவதாக! பல்லவி

குரு: மன்றாடுவோமாக:

வாழ்வளிக்கும் வள்ளலாகிய இறைவா. படைப்பின் தொடக்கத்திலேயே ஆணையும், பெண்ணையும் படைத்துத் திருமண ஆசியால் அவர்களை ஒன்றிணைத்தீர். தோபியா, சாராவின் இல்லறம் தழைக்க உம் அதிதூதர் இரபேலை அனுப்பிக் காத்தீர். தங்கள் திருமண ஆண்டு நாளில் உம் திருவடி தொழுது நன்றி கூறவும், தங்கள் மண ஒப்பந்தத்தைப் புதுப்பித்து உறுதிப்படுத்தவும் உம் திருமுன் வந்துள்ள உம் அடியார்கள் (திரு ……..  திருமதி …….. ) இவர்களைத் தயவாய்க் கண்ணோக்கியருளும். இவர்களது அன்பை ஆசீர்வதித்து, அது இன்னும் அதிகமாக நிலைத்துச் செழித்து வளரவும், கிறிஸ்துவுக்கும் திருச்சபைக்கும் உள்ள உறவை இன்னும் சிறப்பாக எடுத்துக்காட்டவும் அருள்வீராக.

(குரு தம் கைகளை நீட்டி)

நீங்கள் உள்ளத் தூய்மையும் உடல் நலமும் உம் மக்களால் ஆனந்தமும் உற்றார் உறவினரால் ஆதரவும் பெற்று, இல்லார்க்கு வள்ளல்களாய், எல்லார்க்கும் நல்லவர்களாய் அமைதியும், இன்பமும், அன்பும், சமாதானமும் ததும்ப நீடூழி வாழுமாறு எல்லாம் வல்ல இறைவன்  ✠ தந்தை, மகன், தூய ஆவி தம் ஆசியால் உங்களை நிரப்புவாராக.

எல்: ஆமென்.

(குரு காணிக்கைத் திரிகளைப் பெற்றபின் தீர்த்தம் தெளிக்கிறார்.)

திருமண ஒப்பந்தத்திற்காக ஆசியுரை

(மோதிரம்,மாலை, உடை போன்றவற்றை மந்திரித்தல்.)

குரு: தந்தை, மகன், தூய ஆவியின் பெயராலே

எல்: ஆமென்.

குரு: நம் ஆண்டவராகிய இயேசு கிறிஸ்துவின் அன்பும் அருளும் உங்களோடு இருப்பதாக.

எல்: உம்மோடும் இருப்பதாக.

அருள்வாக்கு: தொநூ.24:2-4, 9-20, 50-54

ஒரு நாள் ஆபிரகாம் தம் வீட்டின் வேலைக்காரர்களில் மூத்தவரும், தமக்குரிய அனைத்திற்கும் அதிகாரியுமானவரை நோக்கி, "உன் கையை என் தொடையின் கீழ் வைத்து, விண்ணுலகிற்கும் மண்ணுலகிற்கும் கடவுளாகிய ஆண்டவர் மேல் ஆணையிட்டுச் சொல்: நான் வாழ்ந்துவரும் இக்கானான் நாட்டுப் பெண்களிடையே என் மகனுக்குப் பெண்கொள்ளமாட்டாய் என்றும் என் சொந்த நாட்டிற்குப் போய், என் உறவினரிடம் என் மகன் ஈசாக்கிற்குப் பெண்கொள்வாய் என்றும் சொல்" என்றார். அவ்வாறே அவ்வேலைக்காரரும் தம் தலைவர் ஆபிரகாமின் தொடையின் கீழ் கையை வைத்து அக்காரியத்தைக் குறித்து வாக்குறுதியளித்தார்.

பின் தம் தலைவரின் ஒட்டகங்களிலிருந்து பத்து ஒட்டகங்களை அவிழ்த்துக் கொண்டு, அவருக்குரிய எல்லாவற்றிலும் சிறந்தவற்றைத் தம் கையோடு எடுத்துக்கொண்டு மெசபொத்தாமியாவிலிருந்த நாகோர் நகர் நோக்கிப் புறப்பட்டுச் சென்றார். பெண்கள் தண்ணீர் எடுக்க வரும் மாலை நேரத்தில், நகர்ப்புறமிருந்த கிணற்றின் அருகில் ஒட்டகங்களுக்குத் தண்ணீர் காட்டுமாறு அவர் அவற்றை மண்டியிடச் செய்தார். அப்போது அவர் சொன்னது: "என் தலைவர் ஆபிரகாமின் கடவுளாகிய ஆண்டவரே, எனக்கு இன்று வெற்றி அளித்தருளும். என் தலைவர் ஆபிரகாமுக்கு இரக்கம் காட்டும். இதோ நான் நீரூற்றின் அருகில் நிற்கிறேன். நகர மக்களின் புதல்வியர் தண்ணீர் எடுக்க இங்கே வருவார்கள். அப்பொழுது நான் 'தண்ணீர் பருகும்படி உன் குடத்தைச் சாய்த்துக் கொடு' என்று கேட்க, 'குடியுங்கள்; மேலும் உங்கள் ஒட்டகங்களுக்கும் குடிக்கத் தண்ணீர் இறைத்து ஊற்றுவேன்' என்று எந்த இளம் பெண் மறுமொழி சொல்வாளோ, அவளே உம் ஊழியனாகிய ஈசாக்கிற்கு உம்மால் தெரிந்து கொள்ளப்பட்டவள் ஆவாளாக! நீர் என் தலைவருக்குப் பேரன்பு காட்டினீர் என்று இதனால் நானும் அறிந்து கொள்வேன்" என்றார்.

அவர் இவ்வார்த்தைகளைத் தமக்குள் சொல்லி முடிக்கு முன்பே, இதோ ரெபேக்கா தம் தோள்மீது குடத்தை வைத்துக் கொண்டு வந்தார். அவர் ஆபிரகாமின் சகோதரர் நாகோருக்கும் அவர் மனைவி மில்க்காவுக்கும் பிறந்த பெத்துவேலின் மகள். அவர் எழில்மிக்க தோற்றமுடையவர்; ஆண் தொடர்பு அறியாத கன்னிப் பெண். அவர் நீரூற்றுக்குள் இறங்கிக் குடத்தை நிரப்பிக் கொண்டு மேலேறி வந்தார். ஆபிரகாமின் வேலைக்காரர் அவரைச் சந்திக்க ஓடிச்சென்று, "உன் குடத்தினின்று எனக்குக் கொஞ்சம் தண்ணீர் குடிக்கத் தருவாயா?" என்று கேட்டார். உடனே அவரும் "குடியுங்கள் ஐயா" என்று விரைந்து தம் குடத்தைத் தோளினின்று இறக்கி அவருக்குக் குடிக்கக் கொடுத்தார். அவர் குடித்து முடித்ததும், மீண்டும் அவரை நோக்கி, 'உங்கள் ஒட்டகங்களும் குடித்து முடியுமட்டும் நான் தண்ணீர் இறைத்துக் கொடுப்பேன்" என்றார். குடத்து நீரைத் தொட்டியில் விரைவாய் ஊற்றிவிட்டு, மேலும் தண்ணீர் இறைக்க நீரூற்றுக்குள் ஓடிச்சென்று ஒட்டகங்கள் அனைத்திற்கும் தண்ணீர் இறைத்து ஊற்றினார். 

அதற்கு லாபானும் பெத்துவேலும் மறுமொழியாக, "இச்செயல் ஆண்டவரால் நிகழ்ந்துள்ளது. நாங்கள் உம்மிடம் இதற்குச் சாதகமாகவோ பாதகமாகவோ ஒன்றும் சொல்லக் கூடாது. இதோ, ரெபேக்கா உம்முன் இருக்கிறாள். ஆண்டவர் சொன்னபடியே அவள் உம் தலைவருடைய மகனுக்கு மனைவி ஆகும்படி அவளை அழைத்துக் கொண்டு போங்கள்" என்றார். ஆபிரகாமின் வேலைக்காரர் அவர்களுடைய வார்த்தைகளைக் கேட்டதும் ஆண்டவரைத் தொழுதார். பிறகு அவர் பொன், வெள்ளி நகைகளையும் ஆடைகளையும் எடுத்து ரெபேக்காவுக்குக் கொடுத்தார். அவர் சகோதரருக்கும் தாய்க்கும் விலையுயர்ந்த அன்பளிப்புகளையும் கொடுத்தார். பின் அவரும் அவரோடு இருந்தவர்களும் உண்டு, குடித்து அங்கு இரவைக் கழித்தார்கள். அவர்கள் மறுநாள் காலை எழுந்ததும் அவர்,"என் தலைவரிடம் போக விடை தாருங்கள்" என்றார். 

இது ஆண்டவர் வழங்கும் அருள்வாக்கு.

அறிவுரை

அன்புள்ள சகோதரர் சகோதரிகளே, திருமணம் என்னும் தூய அருட்சாதனத்தின் வழியாக வருங்காலத்தில் புதிய ஒரு கிறிஸ்துவக் குடும்பத்தை உருவாக்க விரும்புவதாக நம் மக்கள் (பெயர்கள்) தங்கள் ஒப்புதலைத் தரப்போகின்றார்கள். இவர்களுடைய இரு குடும்பத்தாரும் பெரியோர்களும் இந்த ஏற்பாட்டிற்குச் சான்று பகரக் கூடியிருக்கிறார்கள்.

இச்சடங்குகளால் இவர்கள் இருவரும் ஒருவர் ஒருவரைக் கண்டு அறிமுகமாக வாய்ப்புப் பெறுகிறார்கள். மேலும் இவர்கள் இன்று முதல் தாங்கள் பெறவிருக்கும் அருள்சாதனத்திற்கும் இல்லற நிலைக்கும் தங்களைத் தக்கவாறு தயார் செய்வார்கள்.

எனவே அன்பு மக்களே! வெளி ஆடம்பரங்களைவிட ஆன்ம ஆயத்தமே முக்கியம் எனக் கருதுங்கள். திருமண அருள்சாதனத்தின் உட்பொருளையும் இல்லற வாழ்வின் மாண்பினையும், உரிமைகளையும், கடமைகளையும், நன்றாகக் கற்று அறிந்து கொள்ளுங்கள். உங்கள் திருமணத்தை இறைவன் நிறைவாக ஆசீர்வதிக்க, செபத்தாலும் ஒப்புரவு, நற்கருணை அருட்சாதனங்கள் வழியாகவும் உங்களைத் தயார் செய்துகொள்ளுங்கள்.

(இப்பொழுது இந்த மண ஒப்பந்தத்தின் அடையாளமாக மோதிரம் (நகை, புடவை) ஆசீர்வதிக்கப்படும்.)

குரு: மன்றாடுவோமாக:

எங்கள் வானகத் தந்தையே, உலக மாந்தர் அளவற்ற உமது அன்பின் மேன்மையைக் கண்டுணருமாறு, உம் திருமகனை மனிதனாக உலகிற்கு அனுப்பினீர். அவ்வாறே நாங்களும் எங்கள் உள்ளத்தின் உணர்வுகள் எண்ணங்களைச் சொல், செயல், சடங்கு வழியாக வெளிப்படுத்த வேண்டுமென விழைகின்றீர்.

இதோ இங்கு நிற்கும் இவ்விருவரும் திருமண அருட்சாதனத்தால் இல்லறத்தில் இணைந்து வாழத் தம் இசைவை வெளிப்படுத்த முன்வந்துள்ளார்கள். இந்த ஒப்பந்தத்திற்கு அடையாளமான இப்பொருள்களை ஆசீர்வதித்தருளும். இவர்கள் தங்கள் விருப்பத்தில் உறுதியாக நின்று, திருவருட்சாதனத்தைப் பெறத் தக்கவாறு ஆயத்தம் செய்வார்களாக. எங்கள் ஆண்டவராகிய கிறிஸ்து வழியாக உம்மை மன்றாடுகிறோம்.

எல்: ஆமென்.

(தீர்த்தம் தெளித்தல்.)

(கூடியிருக்கும் பெரியோர்கள் அப்பொருள்களைத் தொடுவார்கள். பின் வழக்கப்படி திருச்சபையின் விதிகளுக்கேற்ப, மண ஒப்பந்தப் பதிவேட்டில் அவர்கள் இருவரும், குருவும், சாட்சிகளாக வேறு இருவரும் கையொப்பமிடுவர்)

(இறுதியாக குரு அனைவரையும் ஆசீர்வதிக்கிறார்.)

குரு: எல்லாம் வல்ல இறைவன் ✠ தந்தை, மகன், தூய ஆவியின் ஆசி உங்கள்மேல் இறங்கி என்றும் தங்கியிருப்பதாக.

எல்: ஆமென்.

பிறந்தநாள் கொண்டாட்டத்தில் ஆசியுரை

(வீட்டில் கொண்டாடப்படும்பொழுது கிறிஸ்து அரசர் (அல்லது) திரு இருதயப்படம், பிறந்தநாள் கொண்டாடுபவரின் பாதுகாவலர் படம் அலங்கரிக்கப்படலாம். திருமுழுக்கு - புதுநன்மை - உறுதிப்பூசுதல் - திரி ஏற்றப்படலாம். பலகாரங்களைத் தட்டில் வைத்திருக்கலாம்.)

குரு: இங்குள்ள அனைவருக்கும் சமாதானம் உண்டாவதாக. 

எல்: உமக்கும் சமாதானம் உண்டாவதாக.

(படத்திற்கோ விவிலியத்திற்கோ தீப, தூப, மலர் அஞ்சலி எடுக்கலாம்.)

குரு: தந்தை, மகன், தூய ஆவியின் பெயராலே 

எல்: ஆமென்.

(10 வயது வரை உள்ள குழந்தைகளுக்கு)

நற்செய்தி: மத். 19:13-15

சிறு பிள்ளைகள்மேல் இயேசு தம் கைகளை வைத்து வேண்டுதல் செய்யுமாறு அவர்களைச் சிலர் அவரிடம் கொண்டு வந்தனர். சீடரோ அவர்களை அதட்டினர். ஆனால் இயேசு, "சிறு பிள்ளைகளை என்னிடம் வரவிடுங்கள்; அவர்களைத் தடுக்காதீர்கள்; ஏனெனில் விண்ணரசு இத்தகையோருக்கே உரியது" என்றார். அவர்களைத் தொட்டு ஆசி வழங்கிய பின்பு அவர் அவ்விடத்தை விட்டுச் சென்றார்.

இது கிறிஸ்து வழங்கும் நற்செய்தி

(11 வயதுக்கு மேலான இளைஞர்களுக்கு)

நற்செய்தி: லூக். 2:39-42,51, 52

ஆண்டவருடைய திருச்சட்டப்படி எல்லாவற்றையும் செய்து முடித்த பின்பு அவர்கள் கலிலேயாவிலுள்ள தங்கள் ஊராகிய நாசரேத்துக்குத் திரும்பிச் சென்றார்கள். குழந்தையும் வளர்ந்து வலிமை பெற்று ஞானத்தால் நிறைந்து கடவுளுக்கு உகந்ததாய் இருந்தது.

ஆண்டுதோறும் இயேசுவின் பெற்றோர் பாஸ்கா விழாவைக் கொண்டாட எருசலேமுக்குப் போவார்கள்; இயேசுவுக்குப் பன்னிரண்டு வயது ஆனபோது, வழக்கப்படி விழாவைக் கொண்டாட எருசலேம் சென்றனர். பின்பு அவர் அவர்களுடன் சென்று நாசரேத்தை அடைந்து அவர்களுக்குப் பணிந்து நடந்தார். அவருடைய தாய் இந்நிகழ்ச்சிகளையெல்லாம் தமது உள்ளத்தில் பதித்து வைத்திருந்தார். இயேசு ஞானத்திலும் உடல் வளர்ச்சியிலும் மிகுந்து கடவுளுக்கும் மனிதருக்கும் உகந்தவராய் வாழ்ந்து வந்தார்.

இது கிறிஸ்து வழங்கும் நற்செய்தி.

(முதிர் வயதினருக்கு)

அருள்வாக்கு: சீராக் 25:1-6

என் மனத்திற்குப் பிடித்தவை மூன்று; அவை ஆண்டவர் முன்னும் மனிதர் முன்னும் அழகுள்ளவை. அவை: உடன் பிறப்புகளிடையே காணப்படும் ஒற்றுமை, அடுத்திருப்பாரோடு ஏற்படும் நட்பு, தங்களுக்குள் ஒன்றி வாழும் கணவன் மனைவியர். மூன்று வகை மனிதரை நான் வெறுக்கிறேன்; அவர்களின் வாழ்வை நான் பெரிதும் அருவருக்கிறேன். அவர்கள் : இறுமாப்புக் கொண்ட ஏழைகள், பொய் சொல்லும் செல்வர், கூடா ஒழுக்கத்தில் ஈடுபடும் அறிவற்ற முதியவர். உன் இளமையில் நீ எதையும் சேமித்து வைக்காவிடில் முதுமையில் எதைக் காண்பாய்? தீர்ப்பு வழங்குவது நரை திரை விழுந்தோருக்கு ஏற்றது; அறிவுரை கூறுவது பெரியவர்களுக்குத் தக்கது. முதியோருக்கு ஞானமும், மாண்புடையோருக்குச் சிந்தனையும் அறிவுரையும் எத்துணைச் சிறந்தவை. பரந்த பட்டறிவே முதியோருக்கு மணிமுடி. ஆண்டவருக்கு அஞ்சுவதே அவர்களுக்கு மாட்சி.

இது ஆண்டவர் வழங்கும் அருள்வாக்கு.

(சிறிது நேரம் மௌனம் அல்லது மறையுரை) 

(பொருத்தமான பாடல் பாடலாம்.)

குரு: ஆண்டவருடைய பெயராலே நமக்கு உதவி உண்டு. 

எல்: விண்ணையும் மண்ணையும் படைத்தவர் அவரே. 

குரு: இந்தச் சிறுவர் சிறுமிகளுக்காக மன்றாடுவோமாக:

(சிறிது நெரம் மெளனம்)

மாசின்மையை நேசிக்கும் இயேசுவே, நீர் எங்களுக்காகவே மனிதராய்ப் பிறந்து, தூய தாய் மரியாவின் அரவணைப்பிலும் தூய யோசேப்பின் ஆதரவிலும் நாளுக்கு நாள் ஞானத்தில் முதிர்ந்து, கடவுளுக்கும் மனிதருக்கும் உகந்தவராய் வளர்ந்தீர். எங்கள் அருமைச் சிறுவர் (சிறுமி),  வயதில் வளர்ந்து (மற்றோர்) ஆண்டு நிறைவுபெறும் இந்நாளில் இவர் மீது உமது ஆசியைப் பொழிந்தருளும். பெற்றோரின் அன்பான ஆதரவாலும் முன்மாதிரியாலும் இவர் நாளுக்கு நாள் உடல் வளமும், நற்குணப் பயிற்சியும், மறையறிவும் பெற்று அனைவருக்கும் மகிழ்ச்சி தரும் செல்வனாக (செல்வியாக) வாழ்ந்துவர உம்மை இறைஞ்சி மன்றாடுகிறோம்.

(முதியோர்க்கு)

குரு: மன்றாடுவோமாக:

காலம் கடந்த கடவுளே! உயிரினங்கள் அனைத்தும் வாழ்வதும் இயங்குவதும் இருப்பதும் உம்மிலே தான். காலங்களும் பருவங்களும் உமது கையில் உள்ளன. உமக்கு ஒரு நாள் ஓராயிரம் ஆண்டுகள் போலும், ஆயிரம் ஆண்டுகள் ஒரு நாள் போலும் தானே. தமது வயதில் மற்றோர் ஆண்டு நிறைவுறக் கண்டு மகிழ்ந்து உமக்கு நன்றி செலுத்தும் உம் அடியார் இவரைத் தயவாய் ஆசீர்வதித்தருளும். இவர் வயதில் வளர்வதுபோல் உமது அன்பிலும் முதிர்ச்சி அடைந்து, கிறிஸ்துவ ஒழுக்கத்திலும், பிறரன்புச் சேவையிலும் சிறந்தோங்குவாராக. உமது அருள் துணையால் இவர் உள்ளத் தூய்மையும், உடல் நலமும், தொழில் வளமும், பொருள் செல்வமும் (பிள்ளைகளின் அன்பையும், ஆதரவையும்) பெற்று உமக்கு உகந்தவராக நீடூழி வாழ வேண்டுமென்று உம் திருமகனும் எங்கள் ஆண்டவருமான இயேசு கிறிஸ்து வழியாக உம்மை மன்றாடுகிறோம்.

எல்: ஆமென்.

(குரு தீர்த்தம் தெளிக்கிறார்.)

குரு: எல்லாம் வல்ல இறைவன் தந்தை, மகன், தூய ஆவியின் ஆசி இவர் மீதும் இங்குள்ளோர் மீதும் இறங்கி என்றும் தங்கியிருப்பதாக.

எல்: ஆமென்.

பள்ளி ஆண்டு முடிவில் ஆசியுரை

குரு: தந்தை, மகன், தூய ஆவியின் பெயராலே

எல்: ஆமென்.

குரு: நம் ஆண்டவராகிய இயேசு கிறிஸ்துவின் அன்பும் அருளும் உங்கள் அனைவரோடும் இருப்பதாக.

எல்: உம்மோடும் இருப்பதாக.

முன்னுரை

உலக அறிவு, உலக ஞானம் இவற்றில் மட்டுமல்ல. இறையன்பிலும் பிறரன்பிலும் நற்பண்புகளிலும் வளர்ச்சிபெற, சுருங்கக்கூறின், மறை அறிவிலும் மறை வாழ்விலும் படிப்படியாக முன்னேற்றம் காண இப்பள்ளியாண்டில் எத்தனை எத்தனையோ நிகழ்ச்சிகள். வாய்ப்புகள் வழியாக ஆண்டவர் நமக்கு அருளுதவி புரிந்துள்ளார். இவ்வாண்டு முழுவதும் நம்மை எல்லாவிதமான ஆபத்துக்களினின்றும் பாதுகாத்து, அவரது திருக்கரத்தால் வழி நடத்தியுள்ளார். இவ்வாறு இவ்வுலக வாழ்விலும் ஞான வாழ்விலும் ஒருபடி உயர அருள்புரிந்த ஆண்டவருக்கு நாம் இப்பொழுது நன்றிப் புகழ் பாடுவோம்.

பதிலுரைப்பாடல்: திபா. 118:1, 5, 14, 21

பல்லவி: ஆண்டவருக்கு நன்றி செலுத்துங்கள், ஏனெனில் அவர் நல்லவர்.

1. நெருக்கடியான வேளையில் நான் ஆண்டவரை நோக்கி மன்றாடினேன்; ஆண்டவரும் எனக்குச் செவி கொடுத்து என்னை விடுவித்தார். பல்லவி

2. ஆண்டவரே என் ஆற்றல்; என் பாடல்; என் மீட்பும் அவரே. பல்லவி

3. என் மன்றாட்டை நீர் கேட்டதால், எனக்கு நீர் வெற்றி அளித்ததால், உமக்கு நான் நன்றி செலுத்துகின்றேன். பல்லவி

அருள்வாக்கு: பிலி. 4:4-9

ஆண்டவரோடு இணைந்து என்றும் மகிழுங்கள்; மீண்டும் கூறுகிறேன், மகிழுங்கள். கனிந்த உங்கள் உள்ளம் எல்லா மனிதருக்கும் தெரிந்திருக்கட்டும். ஆண்டவர் அண்மையில் உள்ளார். எதைப்பற்றியும் கவலைப்பட வேண்டாம். ஆனால் நன்றியோடு கூடிய இறைவேண்டல், மன்றாட்டு ஆகிய அனைத்தின் வழியாகவும் கடவுளிடம் உங்கள் விண்ணப்பங்களைத் தெரிவியுங்கள். அப்பொழுது, அறிவெல்லாம் கடந்த இறை அமைதி, கிறிஸ்து இயேசுவோடு இணைந்துள்ள உங்கள் உள்ளத்தையும் மனத்தையும் பாதுகாக்கும்.

இறுதியாக, சகோதரர் சகோதரிகளே, உண்மையானவை எவையோ, கண்ணியமானவை எவையோ, நேர்மையானவை எவையோ, தூய்மையானவை எவையோ, விரும்பத்தக்கவை எவையோ, பாராட்டுதற்குரியவை எவையோ, நற்பண்புடையவை எவையோ, போற்றுதற்குரியவை எவையோ, அவற்றையே மனத்தில் இருத்துங்கள். நீங்கள் என்னிடம் கற்றுக்கொண்டவை, என் வழியாய்ப் பெற்றுக்கொண்டவை, என்னிடம் கேட்டறிந்தவை, என் வாழ்வில் நீங்கள் கண்டுணர்ந்தவை யாவற்றையும் கடைப்பிடியுங்கள். அப்போது அமைதியை அருளும் கடவுள் உங்களோடிருப்பார்.

இது ஆண்டவர் வழங்கும் அருள்வாக்கு.

வாக்குறுதி அளித்தல்

குரு: அன்புள்ள தம்பி தங்கையரே, அக இருளினைப் போக்கி, அன்பு எனும் ஒளியினை இதயங்களில் ஏந்தி நிற்கும் உங்களது மாணவ வாழ்வே மனித வாழ்வின் பொற்காலம். எனவே ஞானத்துடனும் விவேகத்துடனும் கடமைகளை நிறைவேற்றி, அறிவில் வளரவும் அன்பில் சிறக்கவும் கடவுள் இதோ உங்களை அழைக்கிறார். நீங்கள் என்ன கூறுகிறீர்கள்?

எல்: உள்ளத்தில் அன்பை வளர்ப்போம்;

வாழ்வில் அதை ஒளிரச் செய்வோம்;

இல்லத்தில் அதை நிலைக்க வைப்போம்.

குரு: நீங்கள் அடைந்த பயிற்சியும், அறிவும், அன்பு செய்யும் திறமையுமே உங்கள் எதிர்காலத்தைத் தீர்மானிக்கின்றன. எனவே உற்சாகமும் ஆர்வமும் கொண்டு அன்பில் தொடர்ந்து வளரக் கடவுள் உங்களை அழைக்கிறார். நீங்கள் என்ன கூறுகிறீர்கள்?

எல்: உள்ளத்தில் அன்பை . . .

குரு: கல்வியோடு கலைகளையும் நற்பண்புகளையும், யாவற்றுக்கும் மேலாக அன்பையும் வளர்ப்பவரே சமூகத்தில் உயர்ந்தவர். எனவே குறிக்கோள் உள்ளவர்களாக, முயற்சியும் பொறுமையும் கொண்டவர்களாக வாழுமாறு கடவுள் இதோ உங்களை அழைக்கிறார். நீங்கள் என்ன கூறுகிறீர்கள்?

எல்: உள்ளத்தில் அன்பை ...

குரு: எடுத்துக்காட்டாக வாழ அழைப்பினை ஏற்ற நீங்கள் இறைவனின் கண்காணிப்பில் வளர்பவர்கள். எனவே உடன் மாணவர்களுக்கு மகிழ்ச்சியையும் சமாதானத்தையும் பரப்பும் சீடராகத் திகழக் கடவுள் உங்களை அழைக்கிறார். நீங்கள் என்ன கூறுகிறீர்கள்?

எல்: உள்ளத்தில் அன்பை ...

குரு: ஆம், தம்பி தங்கையரே, உங்களது தாராள மனதையும் ஆர்வத்தையும் கண்டு இறைவன் பெருமிதம் கொள்கின்றார். 

செல்லுங்கள் – மகிழ்வுடன் செல்லுங்கள்! 

அறிவில் வளரச் செல்லுங்கள்!

அன்பில் வளரச் செல்லுங்கள்!

ஆசியுரை

குரு: மன்றாடுவோமாக:

பெரிய குருவும் போதகருமான இயேசுவே, அறிவின் சுடரே, உமது பெயர் என்றென்றும் வாழ்த்தப்பெறுவதாக. ஆண்டு முழுவதும் இவர்கள் கற்ற கல்வி, பெற்ற அறிவு, உருவாக்கிய எண்ணங்கள். வளர்த்த ஆற்றல்கள் அனைத்தும் இவர்களின் எதிர்கால நல்வாழ்விற்கும், தாய் நாட்டிற்கும் உறுதுணை புரிவனவாக. இவர்கள் ஒவ்வொருவரும் உமது தூய ஆவியின் கொடைகளையும் கனிகளையும் ஏராளமாய்ப் பெற்று, உமது அன்பிலும் பிறரன்பிலும் வளர்ந்து, குடும்பத்திற்கும் தாய் நாட்டிற்கும் நலம் விளைவிக்க அருள்புரிவீராக. என்றென்றும் வாழ்த்து ஆட்சி செய்கின்றவர் நீரே. 

எல்: ஆமென்.

குரு: எல்லாம் வல்ல இறைவன், ✠ தந்தை, மகன், தூய ஆவி இப்பள்ளியின் நிர்வாகத்தினரையும், ஆசிரியப் பெருமக்களையும், மாணவர்களையும் ஆசீர்வதித்து, தம் அன்பில் வழிநடத்திப் பாதுகாப்பாராக.

எல்: ஆமென்.

பள்ளி ஆண்டின் தொடக்க நாளில் ஆசியுரை

குரு: தந்தை, மகன், தூய ஆவியின் பெயராலே

எல்: ஆமென்.

குரு: 'சிறுவர்களை என்னிடம் வரவிடுங்கள்' என்று கூறிய நம் ஆண்டவர் இயேசுகிறிஸ்துவின் அன்பும், நம் அனைவரையும் வழிநடத்தும் தூய ஆவியின் அருளும் உங்களோடு இருப்பதாக.

எல்: உம்மோடும் இருப்பதாக.

குரு: இயேசுவில் அன்பு நிறைந்த ஆசிரியப் பெருமக்களே! பிள்ளைகளே! இன்று பள்ளி ஆண்டின் தொடக்க நாள். தூய ஆவி நம் அனைவர்மீதும் எழுந்தருளி வந்து, அன்பின் கொடைகளையும் கனிகளையும் நம்மீது பொழிந்து, நம்மை வழிநடத்த அருள் வேண்டுவோம்.

பாடல்

வருக தூய ஆவியே

வருக எங்கள் நெஞ்சிலே 

தருக வானின் வரங்களை 

தவழும் தீமை விலகவே!

அகத்தில் ஒளியை ஏற்றவே 

அன்புக் கனலை மூட்டவே 

அறமும் ஒழுங்கும் ஓங்கவே

அருளும் அன்பும் மல்கவே

கொடைகள் ஏழின் வள்ளலே 

கொடுத்தருள்வீர் உம்மையே

பாவ இருளைப் போக்கும் - உம்

தேவ அருளைத் தாருமே.

(விருப்பமானால் குத்துவிளக்கு ஏற்றல். ஆசிரியர், மாணவர், பணியாளர்கள் ஆகியோரின் பிரதிநிதிகள் ஒவ்வொரு திரி ஏற்றலாம். திருவிவிலியத்திற்குத் தீப, தூப, மலர் அஞ்சலி செய்யலாம்.)

அருள்வாக்கு                                                                          கொலோ. 3:12-17

நீங்கள் கடவுளால் தேர்ந்துகொள்ளப்பட்டவர்கள், அவரது அன்பிற்குரிய இறைமக்கள். எனவே அதற்கிசைய பரிவு. இரக்கம். நல்லெண்ணம், மனத்தாழ்மை, கனிவு, பொறுமை, ஆகிய பண்புகளால் உங்களை அணிசெய்யுங்கள். ஒருவரை ஒருவர் பொறுத்துக் கொள்ளுங்கள். ஒருவரைப்பற்றி ஒருவருக்கு ஏதாவது முறையீடு இருந்தால் மன்னியுங்கள். ஆண்டவர் உங்களை மன்னித்ததுபோல நீங்களும் மன்னிக்க வேண்டும். இவையனைத்துக்கும் மேலாக, அன்பையே கொண்டிருங்கள். அதுவே இவையனைத்தையும் பிணைத்து நிறைவுபெறச் செய்யும். கிறிஸ்து அருளும் அமைதி உங்கள் உள்ளங்களை நெறிப்படுத்துவதாக! இவ்வமைதிக்கென்றே நீங்கள் ஒரே உடலின் உறுப்புகளாக இருக்க அழைக்கப்பட்டீர்கள். நன்றியுள்ளவர்களாயிருங்கள்.

கிறிஸ்துவைப்பற்றிய நற்செய்தி உங்களுக்குள் நிறைவாகக் குடிகொள்வதாக! முழு ஞானத்தோடு ஒருவருக்கு ஒருவர் கற்பித்து அறிவுரை கூறுங்கள். திருப்பாடல்களையும் புகழ்ப்பாக்களையும் நன்றியோடு உளமாரப் பாடிக் கடவுளைப் போற்றுங்கள். எதைச் சொன்னாலும் எதைச் செய்தாலும் அனைத்தையும் ஆண்டவர் இயேசுவின் பெயரால் செய்து அவர் வழியாய்த் தந்தையாம் கடவுளுக்கு நன்றி செலுத்துங்கள்.

இது ஆண்டவர் வழங்கும் அருள்வாக்கு.

அறிவுரை

அன்புப் பிள்ளைகளே! நம்மிடம் விளங்க வேண்டிய பண்புகளைத் தூய பவுல் விளக்கினார். அப்பண்புகளில் ஒன்றினையாவது இவ்வாண்டில் நம் நெஞ்சங்களில் வேரூன்றச் செய்யவேண்டும். எல்லாவற்றிற்கும் மேலாக இயேசுவின் அன்பும் அமைதியும் நம்மிடையே என்றும் நிலவ வேண்டும்.

ஆசிரியப் பெருமக்களே! இயேசுவைப்போன்று நீங்களும் போதித்து, உங்களிடம் ஒப்படைக்கப்படும் இவர்களிடையே கிறிஸ்துவை உருவாக்க முயல்வீர்களாக.

(சிறிது நேரம் மௌனமாக மன்றாடுவோம்.)

(விருப்பமானால் ஒரு பாடல் பாடலாம்.)

நற்செய்தி: லூக் 18:15-17

குழந்தைகளை இயேசு தொடவேண்டும் என்று அவர்களைச் சிலர் அவரிடம் கொண்டு வந்தனர். இதைக் கண்ட சீடர் அவர்களை அதட்டினர். ஆனால் இயேசு அவர்களைத் தம்மிடம் வரவழைத்து, "சிறுபிள்ளைகளை என்னிடம் வரவிடுங்கள்; அவர்களைத் தடுக்காதீர்கள்: ஏனெனில் இறையாட்சி இத்தகையோருக்கே உரியது. இறையாட்சியைச் சிறு பிள்ளையைப்போல் ஏற்றுக்கொள்ளாதோர் அதற்கு உட்படமாட்டார் என நான் உறுதியாக உங்களுக்குச் சொல்கிறேன்" என்று சீடர்களிடம் கூறினார்.

இது கிறிஸ்து வழங்கும் நற்செய்தி.

(சிறிது நேரம் மௌனம்.)

மன்றாட்டுக்கள்

1. நாங்கள் முறையான கல்வியைத் தகுந்த முறையில் பெற்றிட எங்கள் திருமறைத் தலைவர்கள் ஆவன செய்யும்படியாக உம்மை மன்றாடுகிறோம்.

எல்: ஆண்டவரே, எங்கள் மன்றாட்டைக் கேட்டருளும்.

2. கல்வி அறிஞர்களின் பரிந்துரைகளுக்கு ஏற்ப, எங்கள் தாயகத் தலைவர்கள் எங்களுக்குப் பயனுள்ள, வாழ்க்கையோடு இணைந்த கல்வியை அளிக்கும்படியாக உம்மை மன்றாடுகிறோம்.

3. நாங்கள் பொதுக் கல்வியைப் பெறுவதோடு, மறைக் கல்வியையும் முறையாகப் பயின்று, இறைப்பற்றும் நாட்டுப்பற்றும், ஒழுக்கமும் பண்பாடும் நிறைந்தவர்களாய் வாழும்படியாக உம்மை மன்றாடுகிறோம்.

4. ஆசிரியப் பெருமக்கள் கடமை உணர்வோடு செயலாற்றி எங்களில் கிறிஸ்துவை உருவாக்கும்படியாக உம்மை மன்றாடுகிறோம்.

5. எங்களுக்குக் கற்பிக்கும் ஆசிரியர்கள், தாயகத் தலைவர்கள், திருமறைப் பெரியோர்கள் அனைவரையும் ஆசீர்வதித்து, அவர்கள் வாழ்வு மலர்ந்திட, பணி சிறந்திட வரமருளும்படியாக உம்மை மன்றாடுகிறோம்.

6. எங்கள் அருமைப் பெற்றோர், உடன்பிறந்தோர்,உறவினர், நண்பர், நன்கொடையாளர் அனைவரும் எங்களுக்காகச் செய்யும் தியாகங்களுக்குக் கைம்மாறாக நூறு மடங்கு பலன் பெற்று வாழும்படியாக உம்மை மன்றாடுகிறோம்.

7. எங்கள் பள்ளியின் நிர்வாகத்தினரையும் (நிர்வாகியையும்) தலைமை ஆசிரியரையும் (ஆசிரியையும்) ஆசீர்வதித்து, எங்களை அன்பின் நெறியில் வழிநடத்தப் போதுமான அருளையும் ஆற்றலையும் தந்தருளுமாறு உம்மை மன்றாடுகிறோம்.

ஆசியுரை

குரு: (தமது வலதுக் கரத்தை நீட்டி)

ஆண்டவராகிய இயேசுவே! பள்ளி ஆண்டின் தொடக்க நாளாகிய இன்று இங்குக் குழுமியுள்ள ஆசிரியர்கள், மாணவர்கள் / மாணவியர் மீது உமது வான ஆசியைப் பொழிந்தருளும். அன்று குழந்தைகளை அன்புடன் அரவணைத்து ஆசீர்வதித்தீரே; இதோ இக்குழந்தைகள்மீது கருணைக்கண் நோக்கும். இவர்கள் கள்ளமற்ற மனத்தவராய், வெள்ளை உள்ளம் படைத்தவராய் உம்மைப்போல் வாழ வரமருளும்.இங்கு வழங்கப்படும் கல்வியை இவர்கள் கருத்துடன் பயின்று அறிவில் சிறந்து விளங்கச் செய்தருளும். எல்லாத் துறைகளிலும் இவர்கள் வளர்ச்சி அடைந்து, எதிர்கால இந்தியாவின் தொண்டர்களாய், தலைவர்களாய், மங்காப்புகழ் மணக்கும் மணிகளாய் வாழச் செய்தருளும்.

ஆண்டவரும் ஆசிரியருமான இயேசுவே! 'யாம் பெற்ற இன்பம் பெறுக இவ்வையகம்' என்னும் கருத்திற்கேற்ப ஆசிரியப் பெருமக்கள் கல்வியைப் போதிப்பார்களாக. சிறப்பாகத் தங்கள் எடுத்துக்காட்டான வாழ்வினால் மாணவர்களில் உம்மை உருவாக்குவார்களாக. பெற்றோர் தங்கள் பிள்ளைகளின் கல்வி வளர்ச்சியில் கவனம் செலுத்தி, ஆசிரியர்களோடு தொடர்பு கொண்டு ஆவன செய்வார்களாக. இவ்வாறு கூட்டு முயற்சியில் இக்கால மாணவர் /மாணவியர் எதிர்காலச் சிற்பிகளாக உருவாக்கப் பெறுவார்களாக. (கைகளைக் குவித்து) என்றென்றும் வாழ்ந்து ஆட்சி செய்கின்றவர் நீரே.

எல்: ஆமென்

குரு: எல்லாம் வல்ல இறைவன் தந்தை, மகன், தூய ஆவி உங்கள் அனைவரையும் ஆசீர்வதிப்பாராக.

எல்: ஆமென்.

(குரு அனைவர்மீதும் தீர்த்தம் தெளிக்கிறார்; 'அழைக்கும் இறைவன் குரல் கேட்போம் அல்லது பொருத்தமான வேறு பாடல் பாடலாம்.)

சிறுவர் சிறுமியர்க்கு ஆசியுரை

குரு: தந்தை, மகன், தூய ஆவியின் பெயராலே

எல்: ஆமென்.

குரு: ஆண்டவருடைய பெயராலே நமக்கு உதவி உண்டு. 

எல்: விண்ணையும் மண்ணையும் படைத்தவர் அவரே.

குரு: நம் இறைவன் இரக்கம் புரிவாராக. 

எல்: அவர் இச்சிறுவரைக் காப்பாராக.

குரு: ஆண்டவரே, எம் மன்றாட்டைக் கேட்டருளும். 

எல்: எம் கூக்குரல் உம்மிடம் வருவதாக.

குரு: ஆண்டவர் உங்களோடு இருப்பாராக. 

எல்: உம்மோடும் இருப்பாராக.

நற்செய்தி: மத் 18:1-5, 10.

சீடர்கள் இயேசுவை அணுகி, "விண்ணரசில் மிகப் பெரியவர் யார்?" என்று கேட்டார்கள். அவர் ஒரு சிறு பிள்ளையை அழைத்து அவர்கள் நடுவில் நிறுத்தி, பின்வருமாறு கூறினார்: "நீங்கள் மனந்திரும்பிச் சிறுபிள்ளைகளைப்போல் ஆகாவிட்டால் விண்ணரசில் புகமாட்டீர்கள் என உறுதியாக உங்களுக்குச் சொல்கிறேன். இந்தச் சிறு பிள்ளையைப் போலத் தம்மைத் தாழ்த்திக்கொள்பவரே விண்ணரசில் மிகப் பெரியவர். இத்தகைய சிறு பிள்ளை ஒன்றை என் பெயரால் ஏற்றுக்கொள்பவர் எவரும் என்னையே ஏற்றுக்கொள்கிறார். இச்சிறியோருள் ஒருவரையும் நீங்கள் இழிவாகக் கருதவேண்டாம்; கவனமாயிருங்கள்! இவர்களுடைய வானதூதர்கள் என் விண்ணகத் தந்தையின் திருமுன் எப்பொழுதும் இருக்கின்றார்கள் என நான் உங்களுக்குச் சொல்கிறேன்.'

இது கிறிஸ்து வழங்கும் நற்செய்தி

(சிறிது நேரம் மௌனம்)

குரு: மன்றாடுவோமாக:

ஆண்டவராகிய இயேசுகிறிஸ்துவே, என்றும் வாழும் இறைவனின் திருமகனே, 'சிறுவர்களை என்னிடம் வரவிடுங்கள். தடுக்க வேண்டாம். ஏனெனில் கடவுளின் அரசு இத்தகையோரதே’ என்று திருவாய்மலர்ந்தீரே. உம்முடைய இச் சிறுவன் (சிறுமி) (இச்சிறுவர்கள்) மீது வல்லமையுள்ள உமது ✠ ✠ ஆசியைப் பொழிந்தருளும். திருச்சபையும் இவர்தம் பெற்றோரும் காண்பிக்கும் விசுவாசத்தையும் பக்தியையும் பார்த்து, இறைவனுக்கும் மனிதர்களுக்கும் முன்பாக இவர்(கள்) வயதிலும் புண்ணியத்திலும் ஞானத்திலும் வளர்ந்து, நலம் பல பெற்று வளமோடு வாழ்ந்து, விரும்பும் முதுமையையும் நீடிய வாழ்நாளையும் அடைவாராக. என்றென்றும் வாழ்ந்து ஆட்சி செய்கின்றவர் நீரே.

எல்: ஆமென்,

(குரு தீர்த்தம் தெளிக்கிறார்.)

குழந்தை(களு)க்கு ஆசியுரை

குரு: ஆண்டவருடைய பெயராலே நமக்கு உதவி உண்டு. 

எல்: விண்ணையும் மண்ணையும் படைத்தவர் அவரே. 

குரு: நம் இறைவன் இரக்கம் புரிவாராக.

எல்: அவர் இக்குழந்தையைக் காப்பாராக. 

குரு: ஆண்டவரே, எம் மன்றாட்டைக் கேட்டருளும். 

எல்: எம் கூக்குரல் உம்மிடம் வருவதாக. 

குரு: ஆண்டவர் உங்களோடு இருப்பாராக. 

எல்: உம்மோடும் இருப்பாராக.

குரு: மன்றாடுவோமாக:

ஆண்டவராகிய இயேசுவே, என்றும் வாழும் இறைவனின் திருமகனே, கால எல்லைக்குள் குழந்தையாயிருக்க நீர் திருவுளம் கொண்டு, அந்தப் பருவத்துக்குரிய மாசற்ற தன்மையை அன்பு செய்து, உம்மிடம் வந்த குழந்தைகளை அன்புடன் அரவணைத்து ஆசீர்வதித்தீரே. இன்று உம் திருமுன் கொண்டுவரப்பட்டிருக்கும் குழந்தையை(களை) ஆசீர்வதித்தருளும். வயதிலும், ஞானத்திலும், அருளிலும் இக்குழந்தை(கள்) வளர்ந்து, உமக்கு என்றென்றும் ஊழியம் செய்ய அருள்தாரும். என்றென்றும் வாழ்ந்து ஆட்சி செய்கின்றவர் நீரே.

எல்: ஆமென்.

குரு: எல்லாம் வல்ல இறைவன் ✠ தந்தை, மகன், தூய ஆவி உங்கள் அனைவரையும் ஆசீர்வதித்து என்றும் காப்பாராக.

எல்: ஆமென்.

(குரு அனைவர் மேலும் தீர்த்தம் தெளிக்கின்றார்.)